ليه الأموال الساخنة تحولت لسندات ؟ وفلوس الأجانب بتروح فين؟
ليه الأموال الساخنة تحولت للسندات ؟ وفلوس الأجانب بتروح فين؟
في الفترة الأخيرة، شهدت مصر موجة جديدة من تدفق الأموال الساخنة، اللي بترجع تاني بعد فترة من الغياب 4 سنوات. والسؤال اللي بيطرح نفسه: إيه اللي خلاها ترجع؟ وهل دي علامة على تحسن الاقتصاد المصري؟ ويا ترى إيه الأدوات المالية اللي بتجذب المستثمرين الأجانب دلوقتي؟ هل هي أذون الخزانة ولا السندات؟ وإيه علاقة كل ده بأسعار الفائدة؟
ليه المستثمر الاجنبي بيثق في اقتصادنا واحنا لا؟
السندات الحكومية
المستثمرين العرب والأجانب اللي بيشغلوا فلوسهم في مصر، قرروا يغيروا استراتيجيتهم، وبدل ما يركزوا على أذون الخزانة قصيرة الأجل، اتجهوا لشراء السندات الحكومية طويلة الأجل. ليه؟ عشان يستغلوا ارتفاع العائد عليها، وبكده يحققوا مكاسب أكبر على المدى الطويل.
ومن أهم الأسباب اللي خلت المستثمرين يفضلوا السندات، هو توقعات خفض البنك المركزي لأسعار الفائدة في اجتماعه القادم شهر فبراير.
ده معناه إن اللي هيشتري سندات دلوقتي، هيحقق عوائد أعلى لما تنخفض الفائدة، خاصة إن سعر الفائدة في مصر لسه من الأعلى عالميًا.
أذون وسندات
من ناحية تانية، وزارة المالية بتعتمد على إصدار أذون وسندات الخزانة عشان تسيطر على عجز الموازنة.
البنك المركزي بيصدر أدوات الدين الحكومية من خلال عطاءات بالسوق، وده ساعد في تقدير عجز الموازنة للسنة المالية 2024/2025 بحوالي 1.2 تريليون جنيه، أي ما يعادل 23.5 مليار دولار.
كانت المؤسسات الأجنبية بتبيع أذون الخزانة قصيرة الأجل بشكل مكثف عشان تجمع أرباح سريعة. ولكن بعد كده، غيروا استراتيجيتهم واتجهوا لشراء سندات الخزانة طويلة الأجل، عشان يحققوا عوائد أعلى على المدى البعيد.
العائد المرتفع
عائد أدوات الدين الحكومية المصرية بيعتبر مغري جدًا للمستثمرين الأجانب، خاصة مع ارتفاع أسعار الفائدة محليًا. كمان، مصر منتظمة في سداد عوائد الأذون والسندات بالدولار، وده عامل مهم بيزيد ثقة المستثمرين.
أزمتنا 10 مليار دولار وصندوق يحقق 222 مليار دولار أرباح
مستقبل الأموال الساخنة في مصر
ويتوقع أن الأموال الساخنة تزيد تاني في الفترة الجاية، خاصة مع توقعات خفض البنك المركزي لأسعار الفائدة بداية من 2025. ده هيخلي العائد على أدوات الدين المصرية لسه تنافسي، ويستمر تدفق الاستثمار الأجنبي غير المباشر، اللي هيحافظ على توافر الدولار في السوق، ويجنب مصر تكرار أزمة نقص النقد الأجنبي.
والبنك المركزي بيحاول يعمل توازن بين الحفاظ على تنافسية أدوات الدين الحكومية، وتخفيض أسعار الفائدة بشكل تدريجي عشان يقلل عجز الموازنة. ده هيشجع الاستثمار المباشر، ويساعد في تحقيق معدلات نمو أعلى في المستقبل.
ما علاقة هذا بأسعار الفائدة؟
الاجانب دائما عاوزين الفائدة المرتفة، وبما أن الولايات المتحدة بتخفض الفائدة، فالأموال بتتجه للأسواق الناشئة للاستفادة من الفارق والفائدة الايجابية في السوق المصري، لهذا الفائدة هي الاساس في جذب الأموال الساخنة
