5 نصايح تحافظي بيها على صحة شعرك تحت الحجاب
طول اليوم لابسة الحجاب، سواء في الشغل أو الدراسة، ودايماً قلقانة إن شعري مش بيتهوى كويس، وده ممكن يسبب قشرة وتساقط! فإزاي أهتم بشعري وهو متغطّي؟ بمناسبة اليوم العالمي للحجاب اللي بيوافق السبت 1 فبراير، خلينا نتكلم عن 5 نصايح بسيطة تحافظي بيها على صحة شعرك تحت الحجاب:
- اختاري قماش الحجاب الصح
القطن، الحرير، والخيزران من أحسن الأقمشة اللي بتساعد على تهوية الشعر وبتقلل الاحتكاك، فلو لسة بتختاري، خليهم ضمن أولوياتك علشان تحافظي على ترطيب شعرك.
- بلاش تربطي شعرك بقوة
عشان تبقي متطمنة إن شعرك مش هيبان، بنربطه جامد، بس ده للأسف بيؤدي لتقصفه وتكسره! الأفضل تربطيه برفق وتستخدمي توك قطنية ناعمة وتبعدي عن التوك الضيقة اللي بتضغط عليه.
- اهتمي بفروة رأسك
استخدمي شامبو خالي من الرغوة عشان ينظف شعرك من غير ما يجففه، وخدي بالك من تدليك فروة الرأس بلطف، وكمان جففي شعرك كويس بعد الغسيل.
- رطبي شعرك باستمرار
الزيوت الطبيعية زي زيت جوز الهند أو الأرغان بتساعد شعرك يفضل صحي ومرطب، استخدميها مرتين لثلاث مرات في الأسبوع، وكمان مشطي شعرك بمشط واسع عشان تتجنبي تقطيعه.
- سيبي شعرك يتنفس
حاولي تسيبي شعرك فترة من غير حجاب في البيت عشان يتجدد ويتنفس، وده هيحافظ على صحته ويقلل التساقط.
خلي دايماً العناية بشعرك من أولوياتك، لأنه يستاهل الحب والاهتمام حتى تحت الحجاب
