ما هى خطوات فتح حساب بالبنوك
والفرق بين الحساب الجاري وحساب التوفير
نفسك يكون عندك حساب في البنك، تسحب وتحول فلوس من مكانك من غير ما تضطر تروح البنك! طيب، تعرف إيه الفرق بين الحساب الجاري وحساب التوفير؟ وأيهما أفضل.
أكيد جت لك أسئلة كتير عن خطوات فتح حساب في البنوك وإيه الإجراءات والشروط المطلوبة؟ هل الحساب لازم يكون فيه رصيد، ولو آه، أقل رصيد ممكن يكون كام؟ وهل لازم يكون الحساب باسم واحد كبير في السن، ولا ممكن أي حد يفتح حساب؟ ولو فتحت حساب، هل تفتح جاري ولا توفير، وأيهما أحسن؟
لازم تعرف إن البنوك سهلت كتير من الإجراءات لفتح الحسابات للمواطنين مجانًا وبدون رسوم إدارية أو حد أدنى للرصيد.
كل اللي هتحتاجه هو صورة من بطاقة الرقم القومي، ومش هتحتاج أي مستند يثبت دخلك.
كمان المسئول في البنك هيطلب منك فاتورة مياه أو كهرباء أو غاز أو فاتورة تليفون عشان يثبت محل إقامتك.
الشروط اللي أعلنها البنك المركزي لفتح الحسابات الجديدة تشمل كمان توضيح لوظيفة العميل، غير تقديم ما يثبت مفردات المرتب، ولازم تكون من جهة العمل بالنسبة للموظفين.
أما أصحاب المهن الحرة اللي معندهمش إثبات دخل من جهة عمل، فيقدروا يقدموا البطاقة الضريبية أو السجل التجاري.
أما بالنسبة لشروط فتح الحساب للناس اللي علي المعاش فالبنك اشترط تقديم ما يفيد خروجه على المعاش في بطاقته الشخصية.
ايه الافضل الحساب الجاري ولا حساب التوفير؟
كل حساب من الحسابات اللي وفرتها البنوك لها شوية مميزات، وهيا أن الحساب الجاري بيمكن العميل من عمل التعاملات المتكررة والسريعة مع البنك سواء إيداع أو سحب للفلوس، أما حساب التوفير فهو حساب طويل الامد لحفظ الاموال في البنك علي سبيل الادخار.
الحساب الجاري يناسب أكثر الأشخاص اللي بيقوموا بعمليات سحب وإيداع بشكل متكرر زي الافراد العاديين والتجار والمستثمرين، لكن حساب التوفير يناسب الأشخاص اللي عايزين يستفيدوا من العوائد والفوايد الشهرية والمدخرين اللي عندهم خطط مستقبلي للاستمثار في الأموال والاحتفاظ بيها وتحقيق هامش ربح شهري منها.
وعلشان نكون عارفين أن الحساب الجاري العميل بياخذ دفتر شيكات للتعاملات المالية، لكن في حسابات التوفير بينزل للعميل فوايد دورية علي حساب في البنك وهي الارباح اللي بتحققها الفلوس بتاعته في البنك .
