يعني إيه شمول مالي؟وما هى أهميته؟
ما هو الشمول المالى ؟ وماهى أهميته خاصة بعد تخصيص عدد من البنوك لإدارات مركزية بها تهتم بهذا الشأن لتحسين مستوى الشمول المالي في مصرتهت.
الشمول المالي هو ان كل فرد او مؤسسة في المجتمع تلاقي منتجات مالية مناسبة لاحتياجاتها، منها مثلاً:
- حسابات توفير
- حسابات جارية
- خدمات الدفع والتحويل
- التأمين
- التمويل والائتمان
- وغيرها من المنتجات والخدمات المالية ا لمختلفة
المنتجات دي لازم تتقدم من خلال القنوات الشرعية، مثل البنوك وهيئة البريد والجمعيات الأهلية وغيرهم، وكمان لازم تبقى أسعارها مناسبة للجميع ويكون سهل الحصول عليها وتراعي حماية حقوق المستهلك.
كل ده عشان نضمن إن كل فئات المجتمع يبقي عندهم فرص مناسبة لإدارة أموالهم ومدخراتهم بشكل سليم وآمن لضمان عدم لجوء الأغلبية للوسائل غير الرسمية التي لا تخضع لأية رقابة وإشراف، اللي ممكن تعرضهم لحالات نصب او تفرض عليهم رسوم مُبالغ فيها.
إيه أهمية الشمول المالي و أ هدافه ؟
الشمول المالي سبب رئيسي للنمو الاقتصادي للدولة والاستقرار المالي ……. ازاي ؟
عشان الحالة الاقتصادية للدولة عمرها ما هتتحسن طول ما فيه عدد كبير من الأفراد والمؤسسات مستبعدين ماليا من القطاع المالي الرسمي. كمان الشمول المالي بيضمن ان المؤسسات المالية تطور منتجاتها وكمان يتنافسوا مع بعض عشان يقدموا منتجات مالية ارخص وأسهل وتراعي مصلحة المستهلك.
الشمول المالي بيهتم بشرائح كتيرة في المجتمع، وخصوصا الشرائح المهشمة أو اللي مش لاقيه منتجات مالية رسمية تناسب احتياجاتها، زي مثلا الفقراء ومحدودي الدخل وخاصة المرأة وأصحاب المشروعات الصغيرة والمتوسطة ومتناهية الصغر، والاطفال والشباب وغيرهم. الشمول المالي بيضمن ان كل الفئات دى تلاقي منتجات مالية مناسبة لاحتياجاتهم وظروفهم وده يؤدى لارتفاع مستوي المعيشة وبالتالي خفض معدلات الفقر وتحقيق النمو الاقتصادي للافراد وللدولة.
أزاي نحقق الشمول المالي؟
عشان اى دولة تحقق الشمول المالي، لازم اولا يتعمل دراسة عشان نعرف الخدمات المالية الموجودة مناسبة ولا لأ والمستهلك عايز اية من الخدمات المالية المختلفة. ودي اول خطوة عشان الدولة تقدر تحط اهداف ترفع بيها مستوي الشمول المالي وده هيتطلب مشاركة جهات كتير في الدولة.
وحماية المستهلك مهمة جدا في الحالة دي عشان نزود ثقة الشعب في القطاع المصرفي والمالي وده بيتم عن طريق :
- حصول العميل علي معاملة عادلة وشفافة وعلي الخدمات والمنتجات المالية بكل سهولة وبتكلفة مناسبة.
- تزويد العميل بكل المعلومات اللازمة في كل مراحل تعامله مع مقدمي الخدمات المالية .
توفير خدمات استشارية اذا احتاج العميل.
الاهتمام بشكاوي العملاء والتعامل معها بكل حيادية.
ومهم أوى برضه تطوير خدمات ومنتجات مالية جديدة تعتمد على الادخار والتأمين ووسائل الدفع مش بس على الإقراض والتمويل لتلبية احتياجات كل فئات المجتمع.
لازم الدولة كمان تهتم بموضوع التثقيف والتوعية المالية وده مش حيتحقق الا بالتعاون مع جهات حكومية، عشان نفيد الفئات المستهدفة اللي بتحتاج لزيادة الوعي المالي زي المشروعات الصغيرة والمتوسطة والشباب والنساء وده بيساعدهم في اتخاذ قرارات سليمة.
