تأثير الزيوت في الطبخ.. إزاي نستخدمها من غير ما نضر صحتنا؟

الزيوت جزء أساسي في مطبخنا المصري، خاصة الزيوت النباتية اللي بنستخدمها في كل الأكلات تقريبًا. هي بتضيف طعم وقوام مميز للأكل، لكن للأسف، الاستخدام الكتير ليها، خصوصًا مع تعرضها لحرارة عالية، ممكن يكون له أضرار صحية كبيرة على المدى البعيد.

بحسب جمعية القلب الأمريكية، الأضرار دي بتختلف حسب نوع الزيت وطريقة استخدامه، لكن كتر استخدامه عمومًا ممكن يزود مخاطر الإصابة بأمراض زي القلب، السمنة، ومشاكل الجهاز الهضمي.

إيه أضرار الزيوت في الطبخ؟

السعرات الحرارية والدهون

ملعقة واحدة من الزيت فيها حوالي 120 سعرة حرارية! يعني الإفراط في الأكل اللي مطبوخ بزيت ممكن يسبب زيادة الوزن اللي بدورها بتأدي لمشاكل تانية زي أمراض القلب، ارتفاع ضغط الدم، والسكري.

الزيت والحرارة العالية

لما الزيوت تتعرض لدرجات حرارة عالية، تركيبتها الكيميائية بتتغير، وده بينتج عنه مركبات ضارة زي الألدهيدات اللي ترتبط بزيادة خطر الإصابة بالسرطان وأمراض القلب، وده بالذات بيحصل مع الزيوت المكررة اللي فيها نسبة عالية من الدهون غير المشبعة.

الدهون المشبعة

بعض الزيوت زي زيت النخيل والزبدة فيها نسب عالية من الدهون المشبعة، ودي بتسبب ارتفاع في الكوليسترول الضار (LDL) في الدم، وده بيزود خطر الإصابة بـ تصلب الشرايين وأمراض القلب.

مشاكل الهضم

الأكل اللي فيه زيت كتير بيزود الدهون اللي بتبطّئ عملية الهضم، وده بيخلي البعض يحسوا بالثقل وعسر الهضم. كمان ممكن يسبب تهيج للأمعاء ويزود إفراز العصارة الصفراوية.

نسبة أوميجا-6

زيوت زي زيت الذرة وزيت الصويا فيها نسبة عالية من أحماض أوميجا-6، ومع الإفراط في استهلاكها بدون توازن مع أوميجا-3، ده ممكن يعزز الالتهابات في الجسم، وده بيزود مخاطر أمراض مزمنة زي التهاب المفاصل وأمراض القلب.

إزاي نقلل أضرار الزيت في الطبخ؟

قللي الكمية

حاولي تقللي كمية الزيت المستخدمة في الطبخ، وجربي طرق تانية زي الشوي، السلق، أو الطهي على البخار.

استخدمي زيوت صحية

بدل الزيوت المكررة، استخدمي زيوت صحية زي زيت الزيتون البكر أو زيت الأفوكادو، لأنها غنية بالدهون الصحية وبتتحمل الحرارة.

تجنبي الحرارة العالية

بلاش تسخني الزيت على حرارة عالية قوي؛ علشان تحافظي على تركيبة الزيت وتتفادي تكوين المواد الضارة.

اوعي تعيدي استخدام الزيت

تكرار تسخين الزيت أكتر من مرة بيزود المواد الضارة اللي بتتكون فيه، وده بيرفع خطر الإصابة بالأمراض اللي ليها علاقة بالدهون المحروقة.

في النهاية، الزيوت مش وحشة لو استخدمناها بحكمة. حاولي تخففي الكمية وتستبدليها بزيوت صحية، ومع تغيير بسيط في طريقة الطبخ، هتحافظي على طعم الأكل وصحتك في نفس الوقت.